Bo-Mnger Shi Nyôr Makurdi

Bo-Mnger Shi Nyôr Makurdi

Bo-mnger shi hide hen gar tamen hi Makurdi, hen kpen tar u Benue ke Najeria er Aôndo nôr ula tugh zan-zan sev puaa yô. Or-ibyaver u ASKiNG RADiO  Terkura David nenge sha ashe na.

U yaav mba bo-mnger ne a er ve tahav i hemba vihin chii je yô ka mba hi Gyado Villa sha gbenda u Gboko ikua-ikua a Benue State University la. Shie u mnyôr hi ya u gen ahwa ataan-kar-ahar pepe nyian yô, mngerem gbam sha iwenge.

Kema ihôwe nenge video sha YouTube heen…

Isaac Bemshima wanye makeranta u shin Benue State un shon u fatyô u za ngeren ikyaren  i semester fele ga la kaa wene, hegen yô ka kwagh u chinkafa i va nan ior ga, ngula la ichigh ki nan orkpen je la, “kwagh u se soo yô ka gwata u injaa u yemen a mngerem shin ifi…beem u ngu nengen inja mvihi ne yô? Mba-agugu man kwaghyan chii u nenge er ve lu shin mnger yô”

Wanye makeranta u gen, Monica Adika tesem kwaghyan, u matras mba yaven sha mi, ityakerada na man i mbayev nav chii shin mnger, man kwagh lu u eren ga.

Chii man m kar m za ya u gen yô hingir inja er me nyôr a nyôr tso nahan sha chi u mnegrem karen iwenge, kwagh chier mo iyol!

Ishigh ki kasev man mbayev hi Gyado Villa doo shami ga chii, man ve chii mba ôrun kwagh zwa môm, e gomenenti a ker gbenda u inja kwagh ne i a kera kimbir ga yô.

Benjamin Adika ka electrician, ya na chii ngu shin mnger, kunya kôr. Televishen man radio man agugu na man u generator tsetsa lu shin mnger.

Benjamin kaa wene hii ahwa pue-kar-uhwar atô-u-tu je tsombur na fatyô yav ga, ve lu nôngun u duen a ikyav kpa pe veren lu ga.

Shi za hemen u kaan nahan wene i de luun kwagh u a va na chinkafa ga, a wase ve ga. “Imarem ka heen, man ka pe ka se zer nengen a imbya ne hanma inyom jene. Kwagh gba se a chinkafa ga, i de u tsughun se, kwagh u se soo yô ka gwata u vesen u yemen a mngerem man shin ifi u river Benue. Ka chii kwagh u se soo je la”, Benjamin za hemen u kaan.

U yaav mba sha Gboko Road hen Makurdi heen yange i vihi ve iyol shie u bo-mnger yange va ke inyom i 2012 la kpishi, man mlu u ilu lun ne yô ka inja voughul er kwagh hii-a-hii je yô.

Related Posts

Facebook Comments